السلام عليكم ورحمة الله وبركاته
حوار عجبنى اسلوب المتحدث فيه لانه رجل واعى ويمتاز بشيئين الا وهما العلم والخبرة افضل ما قيل فى الحديث بين الصحفية نهاد و دكتور شريف عرفة الكاتب المتخصص فى البرمجة اللغوية العصبية و التنمية الذاتية ورسام الكاريكاتير فى مجلة روز اليوسفس
كلمنى عن كيفية تخطى الفشل او التفكير بايجابية؟
قولي كام واحد واخد لقب بطل العالم بالنسبة للناس التانية كلهم او كان واحد واخد جائزة نوبل ؟
.اكيد مش كتير.
عشان الانسان يكون ناجح لازم يعرف ان ده صعب وتكون حاطط فى دماغك انك هتكون من القلة فى المجتمع و مش واحد من القطيع،،و هتكون متميز ، وعشان اكون انسان مش عادى او متميز لازم اتعب اوى.
النجاح صعب و محدش هينجح وهو واقف مكانه.
س ازاى نحول الفشل لنجاح؟
مثلا لو جالك سؤال فى امتحان ومعرفتش تجاوبه ده فشل ،هل بعد كده لو جالك السؤال ده مش هتعرف تجاوبه؟ خلاص اتعلمت و التعليم نجاح وفى كلمة مهمة اوى بتقول ان الفاشلين هم ناس توقفوا قبل النجاح بخطوة.عنى انت عمال تجرب كتير و فى المرة اللى فكرت تقف فيها هى دى المرة اللى كنت هتنجح فيها.كل موقف فى مكسب و خسارة لو ركزنا على الوحش هنتعب .السعادة او التعاسة دى اشياء جوانا احنا اللى بنخلقها ...
مفيش حاجة اسمها واقع.
س الثقة فى النفس ازاى انا اثق فى نفسى وقدراتى؟
اولا لا تجعل تقبل الناس لك مقياسا لاحترامك و تقبلك لنفسك..تقبل فكرة ان بعض الناس مش متقبلانى ده شىء طبيعى جدا ،هقولك حاجة فى ندوة من ندواتى قلت للناس اللى بيحب جمال عبد الناصر يرفع ايده..طيب اللي بيحب .جيفارا.. أو غاندي.. أو ..أو .. و كان طبيعي جدا ان مفيش شخصية الناس كلها بتحبها او بتكرهها... .
احنا مينفعش نرضى كل الناس لان الناس مختلفين،فى واحد بيحب اللون الزرق وواحد بيحب الاصفر منا يا هكون ازرق او اصفر.لو الناس مش متقبلاك اعرف ان لا يمكن الناس كلها هتتقبل واحد ،خلى فى بالك ده ،تانى حاجة افصل بين تقديرك لنفسك و تقدير الناس ليك . تالت حاجة اتعلم مهارات التواصل مع الاخرين وبالتالى هعرف اتعامل احسن مع الناس و مش هكون خايف ان حد يرفضنى طب ما يرفضنى..فاقد الشىء لا يعطيه ...لو انا مش متقبل نفسى و حاسس بالتقدير الذاتى الناس هتشوف ده
س فى معظم كتاباتك بتركز على ان مفيش ظروف ..يا ريت تشرح اكتر الموضوع ده؟
الظروف اللى حوالينا مش هى اللى بتعمل احساسنا ،اللى جوانا هو اللى بيخلينا نستدعى شعور السعادة او التعاسة. لما تلاقى نفسك تعيس اعرف ان المشكلة جواك مش فى الظروف.احنا بنتعلم ازاى نعالج مشاعرنا بفن التحكم بالمشاعر.س طب وايه هو سر العلاقات الناجحة؟عامل الناس كما يحبون ان تعاملهم ، لأن لكل انسان ليه شخصيته و طريقته..هتكلم الروسى بالروسى و اليابانى باليابانى،،عاملي كل شخص بالطريقة المناسبة له مش المناسبة ليكي انت .والكلام دة طبعا انا متفق معاه جدا لانه منطقى بمعنى ان مينفعش نتكلم مثلا مع سائق الميكروباص زى ما نتكلم مع استاذ جامعى او صديق لى اكيد كل واحد منهما لابد ان نتحدث معه باسلوب مختلفس
وايه حكاية مناطق الراحة او الـ comfort zones؟
مناطق الراحة هى اعتياد الشخص على القيام بعمل معين وتعود على نتائج هذا العمل ولا يريد ان يغير هذا الشئ لاكن مفيش انسان ناجح و واقف فى ال comfort zone بتاعته،لأ طلع و جرب ونجح .
لازم تضغط على نفسك عشان تنجح،لازم تجرب ومتريحش دماغك و الا هتفضل مكانك.
عايز تقول حاجة تانية؟
احنا بنعيش في الدنيا دي حياة واحدة بس.. خليها تبقى أفضل حياة ممكنة
انا نقلت الموضوع دة علشان الافادة مش اكتر انا نفسى نعيش كلنا وعندنا هدف بنتعب علشان نحققة ونبطل السلبيه
يبقا علينا ان احنا نحقق كل احلامنا ودة طبعا بالتعب ونكون الافضل وذلك للاحساس بقيمت الانسان فى الحياة ولتحقيق الحياة الافضل للاجيال القادمة وطبعا لازم يعلم كل انسان انه له عمر محدد واجل وسوف يرحل عن دنيانا ولا يتبقا منه غير شئ واحد الا وهو ذكراه مهما كان الشخص عظيم او سفية لا يتبقا منه غير الذكرة يعنى تذكر كدة حد زى اديسون مخترع المصباح الراجل دة انا كل ما افتكرة اقول نفسى اكون زية وذكراة خالدة طالما الحياة باقية
تذكر مثلا مجرم حرب فانك كنت تتمنا ان لا تتذكرة ابدا او حتى يختر على بالك فلابد ان نعلم يا جيل المستقبل ان الانسان لا يتبقى منه غير الذكرى يارب الموضوع تستفيدو منه اى حاجة
وياريت بلاش كل اللى يشوف الموضوع يقول الله موضوع جميل والكلام دة انا بصراحة مش بحبه انا افضل لو ان الناس تشوف الموضوع وتستفيد بجزء صغير منه ومتردش على الموضوع افضل من ان حد يقراء الموضوع ويرد علية ولا يستفيد منه شئ
يارب يعجبكم الكلام وتستفيدو منة والاهم تقتنعو بية